A Deputación da Coruña publicou este luns as bases dunha nova convocatoria de bolsas destinadas a apoiar á mocidade da provincia na realización de proxectos de investigación e no perfeccionamento de estudos artísticos durante o curso 2026-2027. O programa conta cun orzamento total de 480.000 euros, distribuído en 48 axudas de 10.000 euros cada unha.
Nos últimos anos, o organismo provincial incrementou progresivamente tanto o número de bolsas —de 40 a 48— como a súa contía, que pasou de 8.000 a 10.000 euros por beneficiario.
20 bolsas para proxectos de investigación
Dentro desta convocatoria, ofértanse 20 bolsas de investigación destinadas a persoas tituladas universitarias menores de 36 anos e residentes en calquera concello da provincia. As persoas seleccionadas deberán desenvolver un proxecto durante un período mínimo de nove meses.
Segundo explicou o presidente provincial, Valentín González Formoso, o obxectivo é “ofrecer apoio e oportunidades aos novos talentos coruñeses en diferentes ámbitos”, que abranguen desde as ciencias da saúde ata as humanidades.
A distribución das bolsas por áreas é a seguinte:
- 5 para artes e humanidades
- 4 para ciencias da saúde
- 5 para ciencias sociais, xurídicas ou estudos de xénero
- 4 para ciencias
- 2 para enxeñería e arquitectura
28 bolsas para estudos artísticos
A maiores, a Deputación destina 280.000 euros a 28 bolsas de perfeccionamento artístico, tamén cunha dotación individual de 10.000 euros. Estas axudas permitirán cursar estudos fóra de Galicia en centros de alto nivel.
As bolsas distribúense nas seguintes disciplinas:
- Audiovisual: 3
- Danza e artes do movemento: 3
- Ilustración, artes plásticas e visuais: 4
- Música: 15
- Teatro e interpretación escénica: 3
Ao longo das últimas edicións, este programa facilitou que estudantes da provincia completen a súa formación en cidades como Madrid, Barcelona, Granada ou Valencia, así como en centros especializados de países como Estados Unidos, Francia, Reino Unido ou Países Baixos.
Prazo de solicitudes
O prazo para presentar solicitudes estará aberto entre o 16 de marzo e o 16 de abril. As bases completas das convocatorias e toda a información adicional poden consultarse a través da páxina web oficial da Deputación da Coruña.
